Мустақиллик майдони асосий кўринишини 1966-йилги зилзиладан кейин олди — собиқ Қизил майдон ўлчами уч баравардан кўпроқ кенгайтирилди. Аммо ўзгаришлар зилзиладан олдинроқ бошланган эди: 1965-йилда ўша давр учун замонавий Вазирлар Совети биноси қурилиши бошланди, бино V-шаклидаги таянчлар устида ердан кўтарилган эди.

1970-йилда тўртбурчак қуёшдан ҳимоя панжараси билан безатилган баланд “вазирликлар уйи” қурилиши бошланди. Унга ёнма-ён “Искра” кинотеатри (текис горизонтал композиция) қурилган эди.

Парадлар хиёбони ва Ленин майдонининг меъморлари (Е. Розанов, Б. Мезенцев, Б. Зарицкий, В. Шестопалов, А. Якушев ва Л. Адамов; муҳандислар В. Кричевский, Т. Мелик-Аракелян, Н. Никитин, Ю. Козел, А. Колотийев ва З. Муфтахов) собиқ Иттифоқнинг энг катта майдонларидан бирини яратдилар — фавворалар, гулзорлар ва хиёбонлар билан.

ХХI аср бошида Мустақиллик майдонининг кўриниши ўзгартирилди: парадлар учун кенг йўл торайтирилди, унинг бир қисми яшил майдонларга айлантирилди, вазирликлар баланд биноси 6 қаватга “қисқартирилди”, панжара ўрнига алюкобонд ва қоронғи ойна пайдо бўлди.

Вазирлар Маҳкамасининг брутал биноси 1999-йил 16-феврал воқеаларида зарар кўрди, реконструкция вақтида таянчлар ёпилди ва олтин рангли шиша билан қопланди — меъморларнинг дастлабки ғояси ўтмишда қолди.